Welcome to Souphanouvong University
ສອງມະຫາວິທະຍາໄລ ລາວ-ຈີນ ຍົກສູງການຮ່ວມມືດ້ານການພັດທະນາບຸກຄະລາກອນ ພາຍໃຕ້ຫົວຂໍ້ ການເຝິກອົບຮົມຂ້າມຊາຍແດນ ແມ່ນ້ຳຂອງ-ແມ່ນ້ຳລ້ານຊ້າງ ປະຈໍາປີ 2025.
_________
ໃນຕອນເຊົ້າຂອງວັນທີ 18 ພະຈິກ 2025 ທີ່ ສະຖາບັນຂົງຈື, ມະຫາວິທະຍາໄລສຸພານຸວົງ ໄດ້ມີພິທີເປີດການເຝິກອົບຮົມພາຍໃຕ້ຫົວຂໍ້ ການເຝິກອົບຮົມຂ້າມຊາຍແດນ ແມ່ນ້ຳຂອງ-ແມ່ນ້ຳລ້ານຊ້າງ ປະຈໍາປີ 2025. ເປັນໂຄງການຍົກລະດັບທັກສະດ້ານດິຈີຕອນສຳລັບພາກເໜືອຂອງ ສປປ ລາວ.
ໃຫ້ກຽດເປັນປະທານໂດຍ ທ່ານ Zhang Sheping ກົງສູນໃຫຍ່ ແຫ່ງ ສາທາລະນະລັດ ປະຊາຊົນຈີນ ປະຈໍາແຂວງຫຼວງພະບາງ ແລະ ທ່ານ ຮສ. ວິລະ ອາໂນລັກ ຜູ້ອໍານວຍການ ມະຫາວິທະຍາໄລສຸພານຸວົງ, ມີ ວິທະຍາກອນຈາກສະຖາບັນວິສະວະກໍາ ແລະ ເຕັກໂນໂລຊີ ຈີນ-ລາວ, ມະຫາວິທະຍາໄລວິທະຍາສາດ ແລະ ເຕັກໂນໂລຊີ ຄຸນໝິງ ແລະ ສຳມະນາກອນທີ່ເປັນພະນັກງານ-ອາຈານຈາກມະຫາວິທະຍາໄລສຸພານຸວົງເຂົ້າຮ່ວມຈໍານວນ 40 ກວ່າຄົນ.
ຈັດເຝິກອົບຮົມວຽກງານຄົ້ນຄວ້າວິທະຍາສາດ ໃຫ້ສະມາຊິກແມ່ຍິງໜ່ວຍພາສາສາດ, ມ. ສຸພານຸວົງ.
_________
ວັນທີ 14 ພະຈິກ 2025 ທີ່ຜ່ານມາ, ຄະນະພາສາສາດໄດ້ຈັດພິທີເຝິກອົບຮົມວຽກງານຄົ້ນຄວ້າວິທະຍາສາດໃຫ້ກັບສະມາຊິກແມ່ຍິງ, ໂດຍການເປັນປະທານຂອງທ່ານ ທອງຄໍາ ຮຸ່ງສະຫວາດ, ຮອງຫົວໜ້າຄະນະວິຊາ ຜູ້ຊີ້ນໍາວຽກງານວິຊາການແລະຄົ້ນຄວ້າວິທະຍາສາດ. ມີຫົວໜ້າໜ່ວຍສະຫະພັນແມ່ຍິງ ຄະນະພາສາສາດ ພ້ອມດ້ວຍຄະນະ, ພ້ອມດ້ວຍສະມາຊິກແມ່ຍິງທີ່ເປັນອາຈານແລະນັກສຶກສາເຂົ້າຮ່ວມ.
ເນື້ອໃນການອົບຮົມປະກອບດ້ວຍ ວິທີຂຽນໂຄງການແລະນໍາສະເໜີໂຄງການ, ວິທີຢືນຢັນບົດຄວາມວິຊາການເພື່ອລົງຕີພິມໃນວາລະສານ, ວິທີຂຽນບົດຄວາມວິຊາການຕີພິມລົງວາລະສານ ແລະ ວິທີນໍາສະເໜີບົດຄວາມວິຊາການ.
ວຽກງານຄົ້ນຄວ້າວິທະຍາສາດແມ່ນວຽກງານໜຶ່ງທີ່ມີຄວາມສໍາຄັນຕໍ່ການພັດທະນາວິຊາສະເພາະໃຫ້ກັບພະນັກງານ-ອາຈານ ແລະນັກສຶກສາ, ການຈັດເຝິກອົບຮົມໃນຄັ້ງນີ້ກໍເພື່ອເປັນການເພີ່ມທັກສະດ້ານການວິໄຈໃຫ້ສະມາຊິກແມ່ຍິງໜ່ວຍພາສາສາດມີຄວາມເຂັ້ມແຂງຂຶ້ນໄປເທື່ອລະກ້າວ.
ທ່ານ ປອ. ສົມໃຈ ໄພຍະວົງ ພ້ອມດ້ວຍຄະນະ ໄດ້ເດີນທາງເຂົ້າຮ່ວມປະຊູມ ຢູ່ທີ່ມະຫາວິທະຍາໄລພູເອີ (Pu’er University), ແຂວງຢູນນານ ສປ ຈີນ.
_________
ໃນໄລຍະທີ່ຜ່ານມາມໍ່ໆນີ້ ຄະນະຜູ້ອໍານວຍການມະຫາວິທະຍາໄລສຸພານຸວົງ ນໍາໂດຍທ່ານ ປອ. ສົມໃຈ ໄພຍະວົງ ຮອງຜູ້ອໍານວຍການ ມະຫາວິທະຍາໄລສຸພານຸວົງພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊູມ ຢູ່ທີ່ມະຫາວິທະຍາໄລພູເອີ (Pu’er University) ສປ ຈີນ, ພາຍໃຕ້ຫົວຂໍ້ “2025 Heart-to-Heart Connection Program-Brand Event for Education Cooperation between China and South & Southeast Asia: The 5th Lancang-Mekong Education Cooperation (Pu’er) Forum & Students Art Performance Gala”
ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ໃຫ້ ມ.ສຸພານຸວົງ
_________
ຕອນບ່າຍຂອງວັນທີ 12 ພະຈິກ 2025 ທີ່ສະໂມສອນມະຫາວິທະຍາໄລສຸພານຸວົງ ໄດ້ມີການຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ທີ່ ຄະນະພັກຮາກຖານ ມະຫາວິທະຍາໄລສຸພານຸວົງ ຂຶ້ນຢ່າງເປັນທາງການ ໂດຍການເປັນປະທານຮ່ວມຂອງ ສະຫາຍ ປອ. ຄໍາຄ່ອງ ພົມມະປັນຍາ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງຫຼວງພະບາງ ແລະ ສະຫາຍ ຮສ. ປອ. ວົງປະສິດ ຈັນທະຄູນ ຮອງເລຂາຄະນະພັກຮາກຖານ ມະຫາວິທະຍາໄລສຸພານຸວົງ. ມີບັນດາສະຫາຍກຳມະການຄະນະພັກຮາກຖານ, ຄະນະໜ່ວຍພັກ, ຫົວໜ້າຈຸພັກ, ສະມາຊິກພັກ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ ສະຫາຍ ຮສ. ປອ. ວົງປະສິດ ຈັນທະຄູນ ຮອງເລຂາຄະນະພັກຮາກຖານໄດ້ຂຶ້ນຜ່ານບົດສະຫຼຸບຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2024 ແລະທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ2025.
ມະຫາວິທະຍາໄລສຸພານຸວົງຈັດກອງປະຊຸມສຳມະນາວິຊາການ ລະດັບສາກົນ ຄັ້ງທີ 8
_________
ໃນວັນທີ 5 ພະຈິກ 2025 ທີ່ຜ່ານມາ ມະຫາວິທະຍາໄລສຸພານຸວົງ ໄດ້ມີການຈັດກອງປະຊຸມສຳມະນາວິຊາການລະດັບສາກົນຂຶ້ນ ພາຍໃຕ້ຫົວຂໍ້ ການພັດທະນາວິທະຍາສາດ, ການສຶກສາ, ນະວັດຕະກຳ ເສດຖະກິດ-ສັງຄົມ.
ໂດຍການເປັນປະທານຂອງທ່ານ ຮສ. ປອ. ວົງປະສິດ ຈັນທະຄູນ ຮອງຜູ້ອຳນວຍການມະຫາວິທະຍາໄລສຸພານຸວົງ, ມີວິທະຍາກອນກິດຕິມະສັກ 4 ທ່ານ ຈາກສປປ ລາວ ແລະ ຣາຊະອານາຈັກໄທ, ພ້ອມກັນນັ້ນກໍມີຜູ້ນຳສະເໜີບົດຄວາມຈາກມະຫາວິທະຍາໄລແລະສະຖາບັນການສຶກສາແຫ່ງຕ່າງໆທັງພາຍໃນແລະຕ່າງປະເທດເຂົ້າຮ່ວມຢ່າງຫຼວງຫຼາຍ.
ການຈັດກອງປະຊຸມສຳມະນາວິຊາການລະດັບສາກົນສຳລັບມະຫາວິທະຍາໄລສຸພານຸວົງແມ່ນເປັນຄັ້ງທີ 8 ເຊິ່ງໄດ້ສະແດງໃຫ້ເຫັນເຖິງຄວາມອາດສາມາດແລະຄວາມເຂັ້ມແຂງທາງດ້ານວິຊາການໃນແຕ່ລະໄລຍະທີ່ຜ່ານມາ ແລະ ມີທ່າອ່ຽງໃນການຕີພິມລົງວາລະສານມະຫາວິທະຍາໄລສຸພານຸວົງຈາກນັກວິຊາການທັງພາຍໃນ, ພາກພື້ນ ແລະ ສາກົນເພີ່ມຂຶ້ນ.
ມະຫາວິທະຍາໄລສຸພານຸວົງ ຈັດກອງປະຊຸມສະພາຂຶ້ນຢ່າງເປັນທາງການ
________________
ໃນວັນທີ 04 ພະຈິກ 2025 ທີ່ສໍານັກງານຜູ້ອໍານວຍການມະຫາວິທະຍາໄລສຸພານຸວົງ ໄດ້ມີພິທີເປີດກອງປະຊຸມສະພາມະຫາວິທະຍາໄລ ໂດຍການເປັນປະທານຂອງທ່ານ ປອ. ບຸນທະວີ ສີສຸພັນທອງ ອະດີດຮອງລັດຖະມົນຕີ ກະຊວງແຜນການ ແລະການລົງທຶນ, ປະທານສະພາ ມະຫາວິທະຍາໄລສຸພານຸວົງ, ມີທ່ານ ຮສ. ປອ. ຫຼ້າວັນ ວົງຄໍາສານ ຫົວໜ້າກົມການສຶກສາຊັ້ນສູງ, ພ້ອມດ້ວຍຄະນະຜູ້ອຳນວຍການມະຫາວິທະຍາໄລສຸພານຸວົງ, ພະນັກງານ-ອາຈານ ແລະ ແຂກຖືກເຊີນ ເຂົ້າຮ່ວມ.
ຈຸດປະສົງຂອງກອງປະຊຸມແມ່ນເພື່ອລາຍງານການເຄື່ອນໄຫວວຽກງານດ້ານຕ່າງໆທີ່ຜ່ານມາ ແລະ ທິດທາງແຜນການພັດທະນາມະຫາວິທະຍາໄລສຸພານຸວົງໃນຕໍ່ໜ້າ.
ໃນຕອນເຊົ້າຂອງວັນທີ 03 ພະຈິກ 2025 ທີ່ ສະໂມສອນໃຫຍ່ມະຫາວິທະຍາໄລສຸພານຸວົງ ໄດ້ມີພິທີສະເຫຼີມສະຫຼອງວັນສ້າງຕັ້ງມະຫາວິທະຍາໄລຄົບຮອບ 22 ປີ ຂຶ້ນ, ໂດຍການເປັນປະທານຂອງທ່ານ ຮສ. ວິລະ ອາໂນລັກ ຜູ້ອໍານວຍການມະຫາວິທະຍາໄລສຸພານຸວົງ ມີຄະນະຜູ້ອໍານວຍການມະຫາວິທະຍາໄລ, ບັນດາຫົວໜ້າຄະນະວິຊາ, ພະນັກງານ-ອາຈານ, ແຂກຖືກເຊີນ ແລະ ນັກສຶກສາເຂົ້າຮ່ວມຈໍານວນຫຼວງຫຼາຍ.
ໃນພິທີດັ່ງກ່າວໄດ້ມີການບັນຍາຍພິເສດໃນຫົວຂໍ້ “ ແນວທາງການພັດທະນາມະຫາວິທະຍາໄລສຸພານຸວົງ ໃນອະນາຄົດ ” ຈາກວິທະຍາກອນຜູ້ຊົງຄຸນວຸດທິ ໂດຍ ທ່ານ ຮສ. ປອ. ກອງສີ ແສງມະນີ ອະດີດຮອງລັດຖະມົນຕີກະຊວງສຶກສາທິການ ແລະ ກິລາ, ຜູ້ຊີ້ນຳວຽກງານການສຶກສາຊັ້ນສູງ. ທ່ານໄດ້ກ່າວເຖິງການພັດທະນາມະຫາວິທະຍາໄລສຸພານຸວົງ ຕະຫຼອດ 22 ປີຜ່ານມາ ເຊິ່ງພາຍໃນມະຫາວິທະຍາໄລສຸພານຸວົງໄດ້ມີການພັດທະນາຕໍ່ເນື່ອງຢ່າງບໍ່ຢຸດຢັ້ງເປັນຕົ້ນແມ່ນການພັດທະນາດ້ານບຸກຄະລາກອນ, ພື້ນຖານໂຄງລ່າງ, ການຜະລິດບັນດິດທີ່ມີຄຸນະພາບອອກຮັບໃຊ້ສັງຄົມ, ພ້ອມສາມາດຜ່ານຜ່າບັນດາອຸປະສັກຕ່າງໆເພື່ອກ້າວສູ່ມາດຖານສາກົນເທື່ອລະກ້າວ ແລະ ວິທີການໃນການພັດທະນາມະຫາວິທະຍາໄລສຸພານຸວົງໃນອະນາຄົດໃຫ້ມີຄວາມເຂັ້ມແຂງຮອບດ້ານ.
ພ້ອມດຽວກັນນັ້ນ, ໂອກາດດັ່ງກ່າວ ທ່ານ ຮສ. ປອ. ຄໍາຜາຍ ສີສະຫວັນ ອະດີດຮອງລັດຖະມົນຕີກະຊວງສຶກສາທິການ ແລະ ກິລາ, ອະດີດຜູ້ອໍານວຍການ ມະຫາວິທະຍາໄລສຸພານຸວົງ ໄດ້ຂຶ້ນມີຄໍາເຫັນຕໍ່ແນວທາງການພັດທະນາມະຫາວິທະຍາໄລສຸພານຸວົງ ໂດຍທ່ານໄດ້ໃຫ້ທັດສະນະຕໍ່ກັບການພັດທະນາຕົນເອງ, ພັດທະນາມະຫາວິທະຍາໄລ ແລະ ວຽກງານອື່ນໆທີ່ມີຄວາມທ້າທາຍຕໍ່ກັບມະຫາວິທະຍາໄລ, ກົດໝາຍວ່າດ້ວຍການສຶກສາຊັ້ນສູງ, ວຽກງານປະກັນຄຸນະພາບການສຶກສາ ຫຼື QA ໂດຍເນັ້ນການພັດທະນາວຽກງານວິຊາການ ແລະ ການບໍລິຫານອົງກອນໃຫ້ມີຄວາມໂດດເດັ່ນຍິ່ງໆຂຶ້ນໄປ.
ປິດສາກລົງຢ່າງເປັນທາງການກັບງານ
The 6th Lancang-Mekong College Students’ Goodwill Games & The 8th South Asia and Southeast Asian Countries University Student Culture, Sports. ທີ່ ຄຸນໝິງ, ສປ ຈີນ.
ໂດຍມີ 16 ທີມນັກເຕະ, ຈາກ 4 ປະເທດເຂົ້າຮ່ວມເຊັ່ນ: ສປ ຈີນ, ລາວ, ຫວຽດນາມ ແລະ ໄທ.
ທີມນັກກິລາຈາກ ມະຫາວິທະຍາໄລສຸພານຸວົງ ລົງແຂ່ງຂັນ 5 ນັດ, ຍິງໄດ້ 29 ປະຕູ.
ຮອບຊິງຊະນະເລີດ ທີມນັກເຕະຈາກມະຫາວິທະຍາໄລສຸພານຸວົງ ບໍ່ອາດຕ້ານທານທີມທັບກິລາຈາກ ມະຫາວິທະຍາໄລອຸບົນຣາຊະທານີ ໄວ້ໄດ້. ເສຍປະຕູໄປ 3#1.
ໄດ້ອັນດັບຮອງຊະນະເລີດໄປຄອບຄອງ.
ວັນທີ 21 ຕຸລາ 2025 ທີ່ຫ້ອງປະຊຸມຊັ້ນ 2 ອາຄານສໍານັກງານຜູ້ອໍານວຍການມະຫາວິທະຍາໄລ ນໍາພາໂດຍ ທ່ານ ປອ. ສົມໃຈ ໄພຍະວົງ ຮອງຜູ້ອຳນວຍການຝ່າຍບໍລິຫານ ມະຫາວິທະຍາໄລສຸພານຸວົງ ພ້ອມດ້ວຍຄະນະຕ້ອນຮັບ ທ່ານ Jacques BARAN ທູດການສຶກສາ ຈາກສະຖານທູດຝຣັ່ງ ປະຈຳ ສປປ ລາວ.
ໂອກາດນີ້, ທ່ານ ປອ. ສົມໃຈ ໄພຍະວົງ ໄດ້ກ່າວຕ້ອນຮັບຢ່າງອົບອຸ່ນ ແລະ ກ່າວຂອບໃຈຕໍ່ທ່ານທູດການສຶກສາທີ່ໄດ້ຮັບເອົາມະຫາວິທະຍາໄລສຸພານຸວົງ ເຂົ້າເປັນສະມາຊິກໂຄງການມະຫາວິທະຍາໄລທີ່ໃຊ້ພາສາຝຣັ່ງ.
ການຢ້ຽມຢາມແລະພົບປະໃນຄັ້ງນີ້ຍັງໄດ້ມີການປຶກສາຫາລືຮ່ວມມືດ້ານວິຊາການລະຫວ່າງມະຫາວິທະຍາໄລສຸພານຸວົງ ແລະ ສະຖາບັນການສຶກສາຂອງປະເທດຝຣັ່ງ; ພ້ອມກັນນັ້ນຍັງໄດ້ວາງແຜນການຮ່ວມມືໂຄງການເຝິກອົບຮົມຫຼັກສູດພາສາຝຣັ່ງຂອງພະນັກງານ-ອາຈານ ແລະ ເປິດການຮຽນ-ການສອນຫຼັກສູດພາສາຝຣັ່ງສຳລັບການທ່ອງທ່ຽວເພື່ອຍົກລະດັບການສຶກສາ ເເລະ ການຮ່ວມມືຕໍ່ກັນໃນອະນາຄົດ.