ຍີນດີຕ້ອນຮັບເຂົ້າສູ ມະຫາວິທະຍາໄລ ສຸພານຸວົງ
ຕອນເຊົ້າຂອງ ວັນທີ 10 ມັງກອນ 2025 ມະຫາວິທະຍາໄລ ສຸພານຸວົງ ໄດ້ຈັດກອງປະຊຸມໃຫ່ຍຂອງ ຄະນະພັກຮາກຖານ ໂດຍໄດ້ຮັບກຽດເຂົ້າຮ່ວມ ແລະ ເປັນປະທານ ໂດຍສະຫາຍ ສຸກັນ ບຸນຍົງ ຮອງເລຂາຄະນະບໍລິຫານງານພັກແຂວງ, ມີບັນດາແຂກ ຕາງໜ້າຈາກ ກະຊວງສຶກສາທິການ ແລະ ກິລາ, ຕາງໜ້າຈາກ ພະແນກຈັດຕັ້ງແຂວງ, ພະແນກພາຍໃນ, ກວດກາ, ພະແນກ ສຶກສາທິການ ແລະ ກິລາແຂວງ,ມີ ບັນດາສະຖາບັນການສຶກສາຊັ້ນສູງທົ່ວແຂວງ ແລະ ພະນັກງານບຳນານ ຜູ້ຊົງຄຸນນະວຸດ. ມີຜູ້ແທນສົມບູນທັງໝົດ 125 ສະຫາຍ, ຍິງ 32 ສະຫາຍ, ຊຶ່ງເປັນຕົວແທນໃຫ້ແກ່ສະມາຊິກພັກ ທັງໝົດໃນທົ່ວ ມະຫາວິທະຍາໄລ ສຸພານຸວົງ 345 ສະຫາຍ, ຍິງ 112 ສະຫາຍ, ພ້ອມນີ້ ຍັງມີແຂກຖືກເຊີນ ເຂົ້າຮ່ວມ 13 ສະຫາຍ, ຍິງ 02 ສະຫາຍ.
ວັນທີ 30 ທັນວາ 2024 ທີ່ສະໂມສອນໃຫຍ່ມະຫາວິທະຍາໄລສຸພານຸວົງ ໄດ້ມີກອງປະຊຸມປະກອບຄຳຄິດເຫັນໃສ່ຮ່າງລາຍງານການເມືອງ, ຮ່າງເເຜນພັດທະນາຂະເເໜງການ, ຮ່າງບົດສຳຫຼວດການນຳພາລວມ ເເລະ ທາບທາມບຸກຄະລາກອນ ຮອບທີ ll ຂອງຄະນະພັກຮາກຖານມະຫາວິທະຍາໄລສຸພານຸວົງ ໂດຍພາຍໃຕ້ການເປັນປະທານຂອງສະຫາຍ ສຸກັນ ບຸນຍົງ ຮອງເລຂາຄະນະບໍລິຫານງານພັກເເຂວງ, ຜູ້ຊີ້ນຳວຽກງານພັກ- ພະນັກງານຂັ້ນເເຂວງ, ສະຫາຍ ຮສ ວິລະ ອາໂນລັກ ຮັກສາການເລຂາຄະນະພັກຮາກຖານ ມະຫາວິທະຍາໄລ ສຸພານຸວົງ ມີບັນດາສະຫາຍໃນຄະນະພັກຮາກຖານ, ຄະນະຮັບຜິດຊອບດ້ານບຸກຄະລາກອນຂັ້ນເເຂວງ, ຜູ້ເເທນສົມບູນ ເເລະ ສຳຮອງ ເຂົ້າຮ່ວມ 143 ສະຫາຍ.
ພິທີປະຖົມນິເທດນັກສືກສາປະລິນຍາໂທ ຊຸດໃໝ່ ສົກສຶກສາ2024-2025
ຕອນບ່າຍວັນທີ23 ພະຈິກ 2024 ຜ່ານມາ ທີ່ສະໂມສອນໃຫ່ຍ ມະຫາວິທະຍາໄລສຸພານຸວົງ ໄດ້ຈັດພິທີປະຖົມນິເທດນັກສືກສາປະລິນຍາໂທ ຊຸດໃໝ່ ສົກສຶກສາ2024-2025 ເເລະ ການສະຫຼຸບການຈັດຕັ້ງປະຕິບັດ ສົກສຶກສາ 2023-2024 ພາຍໃຕ້ການເປັນປະທານໂດຍ: ທ່ານ ຮສ ວິລະ ອາໂນລັກ ອະທິການບໍດີມະຫາວິທະຍາໄລສຸພານຸວົງ ມີບັນດາຄະນະນຳ,ຫົວຫນ້າຫ້ອງການ,ຮອງຫົວຫນ້າຫ້ອງການ ,ຫົວຫນ້າພະເເນກ ,ຮອງຫົວຫນ້າພະເເນກ ,ພະນັກງານຄູອາຈານ ເເລະ ນັກສຶກສາປະລິນຍາໂທກໍໃຫ້ກຽດເຂົ້າຮ່ວມ.
ທ່ານ ຕຸລາກອນ ສຸລິຍາ ຮອງຫົວຫນ້າຫ້ອງການຄົ້ນຄວ້າວິທະຍາສາດ ເເລະ ບໍລິຫານວິຊາການ ໄດ້ຂຶ້ນຜ່ານບົດສະຫຼຸບຫຍໍ້ການຈັດຕັ້ງປະຕິບັດຫລັກສູດສົກສຶກສາທີ່ຜ່ານມາ ມີການເຜີຍແຜ່ຂໍ້ກຳນົດກົດລະບຽບ ທົ່ວໄປຂອງນັກສຶກສາ, ເຜີຍແຜ່ຂໍ້ກຳນົດພາລະບົດບາດ,ສິດ ແລະ ໜ້າທີ່ຂອງອາຈານທີ່ປືກສາ, ຜ່ານຂໍ້ຕົກລົງວ່າເຜີຍແຜ່ວຽກງານຄົ້ນຄວ້າວິທະຍາສາດ ເຫັນໄດ້ວ່ານັກສຶກສາແຕ່ລະຄົນກໍໄດ້ເອົາໃຈໃສ່ ຮັບຟັງການເຜີຍແຜ່ຂໍ້ກຳນົດ ນອກຈາກນັ້ນກໍໄດ້ມີການປະກອບຄຳຄິດຄຳເຫັນຂອງຄະນະວິຊາ ເເລະ ນັກສຶກສາອີກດ້ວຍ.
ທ້າຍຂອງພິທີ ທ່ານ ຮສ ວິລະ ອາໂນລັກ ອະທິການບໍດິມະຫາວິທະຍາໄລສຸພານຸວົງ ກໍໄດ້ໃຫ້ກຽດຂື້ນກ່າວໂອ້ລົມ ເເລະ ປະກອບຄຳຄິດຄຳເຫັນໄດ້ຮຽກຮ້ອງໃຫ້ນັກສຶກສາປະລິນຍາໂທທຸກຄົນຈົ່ງຕັ້ງຫນ້າສຶກສາຮໍ່າຮຽນໃຫ້ບັນລຸຕາມຈຸດປະສົງທີ່ວາງໄວ້ ຈົນສຳເລັດ ພ້ອມທັງກ່າວປິດພິທີຢ່າງເປັນທາງການ. ຫລັງຈາກສຳເລັດພິທີປະຖົມນິເທດເເລ້ວຍັງໄດ້ຈັດການເເຂ່ງຂັນກິລາບານເຕະເພື່ອສ້າງຄວາມຜູກເເໜ້ນສາມັກຄີລະຫວ່າງນັກສຶກສາ ເເລະ ຄະນະຄູອາຈານອີກດ້ວຍ.
ຂ່າວ:ເເສງເດືອນ ສີບົວວັນ
ມອບ-ຮັບອາຄານ ຮຽນ ພາກວິຊາພາສາເກົາຫລີ, ຄະນະພາສາສາດ ມະຫາວິທະຍາໄລສຸພານຸວົງ
ຕອນບ່າຍວັນທີ 18 ພະຈິກ 2024 ໄດ້ຈັດພິທີ ມອບ-ຮັບອາຄານຮຽນຂອງພາກວິຊາ ພາສາເກົາຫລີ ຄະນະພາສາສາດ, ມະຫາວິທະຍາໄລສຸພານຸວົງ ໃຫ້ກຽດເຂົ້າຮ່ວມງານຄັ້ງນີ້ ໂດຍມີທ່ານ ຫຼ້າວັນ ວົງຄໍາສານ ຫົວໜ້າກົມສຶກສາຊັ້ນສູງ ກະຊວງສຶກສາທິການແລະກິລາ, ທ່ານ ວິລະ ອາໂນລັກ ອະທິການບໍດີ ມະຫາວິທະຍາໄລ ສຸພານຸວົງ , ສາທຸ ຊິມຊັນ ປະທານມູນນິທິວັດທະນະທໍາຮັນນາແຣ ສ.ເກົາຫຼີ, ມີທ່ານເອກອັກຄະລັດຖະທູດ ສ.ເກົາຫຼີ ປະຈໍາ ສປປ ລາວ, ແຂກຖືກເຊີນ, ຮອງອະທິການບໍ ດີ ມະຫາວິທະຍາໄລເເຫ່ງຊາດ ພ້ອມທັງຄະນະບໍດີ, ຮອງຄະນະບໍດີ, ຫົວຫນ້າຫ້ອງການ, ພະນັກງານຄູ-ອາຈານ ເເລະ ທີມງານມູນລະນິທິວັດທະນະທໍາຮັນນາແຣ ສ.ເກົາຫລີ ຕະຫລອດຮອດນັກສຶກສາກໍໃຫ້ກຽດເຂົ້າຮ່ວມ.
ໃນພິທີ ທ່ານ ປທ ບຸນທະວີ ເເກ້ວບຸນຄົງ ຄະນະບໍດີ ຄະນະພາສາສາດ ໄດ້ໃຫ້ກຽດ ຂຶ້ນ ລາຍງານການກໍ່ສ້າງອາຄານຮຽນໃນຄັ້ງນີ້ ເເລະ ໄດ້ຍ້ອງຍໍຊົມເຊີຍຂອບໃຈຕໍ່ ມູນລະນິທິວັດທະນະທໍາຮັນນາແຣ ປະຈຳ ສປປ ລາວ ຢ່າງສູງ ຕໍ່ ທີ່ໄດ້ ໃຫ້ທຶນ ຊ່ວຍເຫຼືອໃນການກໍ່ສ້າງອາຄານຮຽນ ຢູ່ມະຫາວິທະຍາໄລສຸພານຸວົງ ເຊິ່ງ ເປັນການຊ່ວຍເຫຼືອທີ່ມີຄວາມສໍາຄັນຫຼາຍ ເພື່ອສ້າງໂອກາດໃນການຂະຫຍາຍການສຶກສາ ທາງດ້ານພາສາ ແລະວັດທະນະທໍາ ເກົາຫລີໃຫ້ກັບພາກວິຊາ ພາສາເກົາຫລີ ຄະນະພາສາສາດ ມະຫາວິທະຍາໄລສຸພານຸວົງ, ໂດຍສະເພາະນັກສຶກສາລາວໄດ້ມີໂອກາດ ການ ຮຽນພາສາເກົາຫລີຫຼາຍຂຶ້ນ ແລະ ຫວັງຢ່າງຍິ່ງວ່າຈະ ສືບ ຕໍ່ໃຫ້ທຶນໃນການພັດທະນາການສຶກສາດ້ານອື່ນໆ ຂອງມະຫາວິທະຍາໄລສຸພານຸວົງ ກໍ່ຄືພາກວິຊາພາສາເກົາຫລີ ຢ່າງຕໍ່ເນື່ອງ ແລະຕະຫຼອດໄປ. ນອກນັ້ນ ສາທຸ ຊິມຊັນ ປະທານມູນລະນິທິວັດທະນະທຳຮັນນາເເຣ ເເລະ ຄະນະປະທານກໍໄດ້ໃຫ້ກຽດໂອ້ລົມຕໍ່ພີທີ.
ທ່ານ ຮສ ວິລະ ອາໂນລັກ ອະທິການບໍດີ ມະຫາວິທະຍາໄລສຸພານຸວົງ ກໍໄດ້ ກ່າວວ່າ ພາກວິຊາພາສາເກົາຫລີ, ມະຫາວິທະຍາໄລສຸພານຸວົງ ໄດ້ອີງຕາມບົດບັນທຶກຄວາມເຂົ້າໃຈ MOU ລະຫວ່າງມະຫາວິທະນາໄລສຸພານຸວົງ ຮ່ວມກັບ ມູນລະນິທິວັດທະນະທຳຮັນນາ ເເຣ ສ.ເກົາຫລີ ໃນຄັ້ງວັນທີ 5 ກໍລະກົດ 2023 ມາຮອດ ປັດ ຈຸບັນເເມ່ນໄດ້ກໍ່ສ້າງ ອາຄານ ສຳເລັດເເລ້ວ ໃນເບື້ອງຕົ້ນກໍພົບບັນຫາຫຍຸ້ງຍາກຫຼາຍຢ່າງ ໂດຍສະເພາະ ດ້ານອາຄານສະຖານທີ່ ແລະອຸປະກອນຮັບໃຊ້ເຂົ້າໃນການຮຽນ-ການສອນ. ຊຶ່ງມູນລະນິ ທິ ວັດທະນະທຳຮັນນາເເຣ ສ.ເກົາຫລີ ໄດ້ແກ້ໄຂບັນຫາດ້ານການຈັດການຮຽນ-ການສອນ ພາສາເກົາຫລີ ແລະ ໃຫ້ບໍລິການ ດ້ານວິຊາການ ຈັດການສອບເສັງວັດລະດັບພາສາເກົາຫລີ. ມາຮອດປີ 2023 ທາງພາກ ວ ວິຊາພາສາເກົາຫລີ ຄະນະພາສາສາດ ມະຫາວິທະຍາໄລສຸພານຸວົງ ໄດ້ຮັບການຊ່ວຍເຫລືອຈາກມູນລະນິທິວັດທະນະທຳຮັນນາເເຣ ສ.ເກົາຫລີ ເພື່ອມາກໍ່ສ້າງອາຄານພາສາເກົາຫລີຫຼັງນີ້ ໃຫ້ ສຳເລັດ.
ສຳລັບອາຄານພາກວິຊາ ສາຂາ ພາສາເກົາຫລີຫຼັງໃໝ່ ຂອງຄະນະພາສາສາດ ມະຫາວິທະຍາໄລສຸພານຸວົງ ປະກອບມີ 6 ຫ້ອງຮຽນ, ຫ້ອງ ການ ແລະ ຫ້ອງປະຊຸມ ມີ ອຸປະກອນການຮຽນ ຄົບຊຸດ ແລະຕິດຕັ້ງສື່ການຮຽນ-ການສອນທີ່ທັນສະໄໝ ຄົບຊຸດ,ການກໍ່ສ້າງອາຄານຮຽນຂອງພາກວິຊາພາສາເກົາຫຼີ ໃນມູນຄ່າ 315.000 ໂດຣາສະຫະລັດ. ເປັນອາຄານສອງຊັ້ນ ໃຊ້ເວລາກໍ່ສ້າງເປັນເວລາ 10 ເດືອນຈຶ່ງສຳເລັດ.
ໂອກາດ ອັນສະຫງ່າລາສີ ນີ້ ທາງ ຄະນະປະທານຮ່ວມກັນຕັດແຖບຜ້າ ເພື່ອມອບ-ຮັບອາຄານ ຮຽນ ພາກວິຊາພາສາເກົາຫລີ ຢ່າງເປັນທາງການ ເເລະ ພ້ອມກັນຢ້ຽມຊົມອາຄານຮຽນຕື່ມອີກ.
ຂ່າວ:ເເສງເດືອນ ສີບົວວັນ
ໃນລະຫວ່າງວັນທີ່ 11-16 ພະຈິກໃນອາທິດນີ້ ນັກສຶກສາ ຈາກມະຫາວິທະຍາໄລສຸພານຸວົງ ຈໍານວນ 12 ຄົນ ແລະ ອາຈານ 1 ທ່ານ ໄດ້ເດີນທາງໄປເຝິກອົບຮົມທີ່ ສາທາລະນະລັດ ເກົາຫຼີ, ຫົວຂໍ້ການເຝິກອົບຮົມແມ່ນ 2024 Sookmyung UNESCO UNITWIN Advanced Workshop and Hackathon Program . ໂດຍເປົ້າໝາຍຜູ້ເຂົ້າຮ່ວມເຝິກອົບຮົມໃນຄັ້ງນີ້ແມ່ນນັກສຶກສາທີ່ເປັນເພດຍິງເຊີ່ງເປັນທີມທີ່ຊະນະຈາກການຝຶກອົບຮົມໃນທ້ອງຖີ່ນ (Local training) ເຊິ່ງໄດ້ຈັດຂຶ້ນທີ່ ມະຫາວິທະຍາໄລ Sookmyung, ນະຄອນຫຼວງ Seoul ຂອງ ສາທາລະນະລັດ ເກົາຫຼີ. ມີນັກສຶກສາຈາກ 4 ປະເທດ, 7 ມະຫາວິທະຍາໄລມີນັກສືກສາ ເຂົ້າຮ່ວມທັງໝົດ 70 ຄົນ.
ການເຝຶກອົບຮົມຈະສີ້ນສຸດໃນວັນທີ່ 16 ພະຈິກ 2024
