ຂໍ້ຕົກລົງ

ວ່າດ້ວຍການຈັດຕັ້ງ ແລະ ການເຄື່ອນໄຫວ

ຂອງສະຖາບັນຂົງຈື ມະຫາວິທະຍາໄລ ສຸພານຸວົງ

– ອີງຕາມ: ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງສຶກສາທິການ ແລະ ກິລາ ຂອງນາຍົກລັດຖະມົນຕີ. ສະບັບເລກທີ 633/ນຍ, ລົງວັນທີ 18 ພະຈິກ 2021.

– ອີງຕາມ: ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງມະຫາວິທະຍາໄລ ສຸພານຸວົງ. ສະບັບເລກທີ 099/ນຍ, ລົງວັນທີ 03 ເມສາ 2009.

– ອີງຕາມ: ບົດບັນທຶກກອງປະຊຸມຂອງກົມການສຶກສາຊັ້ນສູງ ການຄົ້ນຄວ້າ ແລະ ປຶກສາຫາລືກ່ຽວກັບ (ຮ່າງ) ດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງ ມະຫາວິທະຍາໄລ 4 ແຫ່ງ ທີ່ຂຶ້ນກັບກະຊວງສຶກສາທິການ ແລະ ກິລາ, ເລກທີ່ 061/ຊສ, ລົງວັນທີ 16 ມັງກອນ 2023.

-ອີງຕາມ: ບົດບັນທຶກກອງປະຊຸມປຶກສາຫາລືການຄົ້ນຄວ້າ ການໂຮມບັນດາຫ້ອງການ ພາຍໃນມະຫາວິທະຍາໄລ ສຸພານຸວົງ ໃຫ້ສອດຄ່ອງຕາມທິດນໍາຂອງກົມການສຶກສາຊັ້ນສູງ, ລົງວັນທີ 30 ມັງກອນ 2023.

ໝວດ​ທີ 1

ບົດ​ບັນ​ຍັດ​ທົ່ວ​ໄປ

ມາດຕາ 1: ຈຸດປະສົງ

ຂໍ້ຕົກລົງສະບັບນີ້ກຳນົດທີ່ຕັ້ງ, ພາລະບົດບາດ, ໜ້າທີ່, ຂອບເຂດສິດ, ໂຄງປະກອບການຈັດຕັ້ງ ແລະ ແບບແຜນວິທີເຮັດວຽກເພື່ອເປັນບ່ອນອີງທາງດ້ານນິຕິກຳໃຫ້ແກ່ການຈັດຕັ້ງ ແລະ ການເຄື່ອນໄຫວຂອງສະຖາບັນຂົງຈືມະຫາວິທະຍາໄລສຸພານຸວົງເພື່ອແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ປະຕິບັດກົດໝາຍ ແລະ ລະບຽບການຂອງລັດໃນການຄຸ້ມຄອງ ແລະ ພັດທະນາວຽກງານການສຶກສາ ກໍ່ຄືແຜນຍຸດທະສາດຂອງມະຫາວິທະຍາໄລສຸພານຸວົງ.

ມາດຕາ​ 2: ທີ່​ຕັ້ງ ​ແລະ ພາລະ​ບົດບາດ

ສະຖາບັນຂົງຈືທີ່ມະຫາວິທະຍາໄລ ສຸພານຸວົງ(ຂຽນຫຍໍ້ວ່າ: “ ສຂຈ.ມສ” ), ມີສຳນັກງານຕັ້ງຢູ່ວິທະຍາເຂດບ້ານດອນໃໝ່, ນະຄອນຫຼວງພະບາງ, ແຂວງຫຼວງພະບາງເປັນສະຖາບັນການສຶກສາແຫ່ງໜຶ່ງທີ່ມີສະຖານະພາບເທົ່າກັບຄະນະວິຊາ ໃນກົງຈັກການຈັດຕັ້ງ ແລະ ຢູ່ພາຍໃຕ້ການຊີ້ນຳມະຫາພາກຂອງມະຫາວິທະຍາໄລສຸພານຸວົງ, ມີພາລະບົດບາດໃນການສ້າງບຸກຄະລາກອນທາງດ້ານພາສາຈີນ ແລະ ສົ່ງເສີມການພົວພັນຮ່ວມມືໃນດ້ານການສຶກສາ, ວັດທະນະທຳ, ຄົ້ນຄວ້າວິທະຍາສາດ ແລະ ວິຊາການອື່ນໆ ລະຫວ່າງ ສປປລາວ ກັບ ສປຈີນເວົ້າລວມ. ເວົ້າສະເພາະ,ລະຫວ່າງ ມະຫາວິທະຍາໄລສຸພານຸວົງ ກັບ ມະຫາວິທະຍາໄລວິທະຍາສາດ ແລະເຕັກໂນໂລຊີຄຸນມິງ ແລະ ບັນດາສະຖາບັນການສຶກສາໃນ ສປຈີນ ເພື່ອພັດທະນາຊັບພະຍາກອນມະນຸດທີ່ຢູ່ ພາຍໃນ ແລະ ພາຍນອກຂອງມະຫາວິທະຍາໄລສຸພານຸວົງ. ດ້ວຍວິທີການຈັດຕັ້ງການຮຽນ-ການສອນພາສາຈີນ, ການຄົ້ນຄວ້າວິທະຍາສາດ, ການຝຶກອົບຮົມ ແລະ ການບໍລິການທາງດ້ານວິຊາການຕ່າງໆໃຫ້ແກ່ສັງຄົມ, ພ້ອມທັງເປັນສື່ກາງໃນການປະສານງານ ແລະ ພົວພັນຮ່ວມມືຂອງສອງຊາດ ລາວ-ຈີນ.

 ໝວດ​ທີ 2

ໜ້າ​ທີ່ ​ແລະ ຂອບ​ເຂດ​ສິດ

ມາດຕາ 3: ໜ້າ​ທີ່

ສະຖາບັນຂົງຈືທີ່ມະຫາວິທະຍາໄລ ສຸພານຸວົງມີໜ້າທີ່ດັ່ງລຸ່ມນີ້:

1. ສ້າງ ແລະ ພັດທະນາບຸກຄະລາກອນຕາມຫຼັກສູດໄລຍະສັ້ນ, ໄລຍະກາງ ແລະໄ ລຍະຍາວທາງດ້ານພາສາຈີນທີ່ຢູ່ໃນຄວາມຮັບຜິດຊອບຂອງຕົນເພື່ອຕອບສະໜອງຄວາມຕ້ອງການຂອງສັງຄົມໃນແຕ່ລະໄລຍະ;
2. ດຳເນີນການໃຫ້ບໍລິການວິຊາການ ແລະ ການຄົ້ນຄວ້າວິທະຍາສາດເພື່ອເປັນປະໂຫຍດໃຫ້ແກ່ການພັດທະນາສະຖາບັນ, ມະຫາວິທະຍາໄລ ແລະ ເສດຖະກິດ-ສັງຄົມຂອງສປປລາວ;
3. ດຳເນີນກິດຈະກຳຕ່າງໆທາງດ້ານ ພາສາ ແລະ ວັດທະນະທຳ ເພື່ອເປັນການສົ່ງເສີມສາຍພົວພັນມິດຕະພາບຂອງສອງຊາດລາວ-ຈີນໂດຍຄຽງຄູ່ກັບການຂະຫຍາຍ ແລະ ເຊື່ອມໂຍງທາງດ້ານເສດຖະກິດ, ສັງຄົມ ແລະວັດທະນະທໍາ;
4. ຈັດຕັ້ງປະຕິບັດການພົວພັນຮ່ວມມືກັບ ສປຈີນ ພາຍໃຕ້ນະໂຍບາຍຂອງພັກ ແລະ ລະບຽບກົດໝາຍຂອງລັດ;
5. ເປັນເສນາທິການໃຫ້ມະຫາວິທະຍາໄລສຸພານຸວົງໃນການລະດົມທຶນ ແລະ ຍາດແຍ່ງເອົາການຊ່ວຍເຫຼືອຈາກອົງກອນຕ່າງໆ ຂອງ ສປ ຈີນເພື່ອນຳໃຊ້ເຂົ້າໃນການພັດທະນາຊັບພະຍາກອນມະນຸດ, ການຮຽນ-ການສອນ, ການຄົ້ນຄວ້າວິທະຍາສາດ ແລະ ພື້ນຖານໂຄງລ່າງໃນມະຫາວິທະຍາໄລສຸພານຸວົງ;
6. ປະຕິບັດໜ້າທີ່ອື່ນໆຕາມການມອບໝາຍຂອງມະຫາວິທະຍາໄລສຸພານຸວົງ ແລະ ຂັ້ນເທິງ.

ມາດຕາ 4: ຂອບ​ເຂດ​ສິດ

ສະຖາບັນຂົງຈື ທີ່ມະຫາວິທະຍາໄລ ສຸພານຸວົງມີຂອບເຂດສິດດັ່ງລຸ່ມນີ້:

1. ຄົ້ນຄວ້າ ແລະ ສະເໜີແຜນໃນການພັດທະນາແຕ່ລະໄລຍະຂອງຕົນ ຕໍ່ກັບມະຫາວິທະຍາໄລສຸພານຸວົງ;
2. ຄົ້ນຄວ້າ ແລະ ນຳສະເໜີການສ້າງຕັ້ງ, ການບັນຈຸ, ການຊັບຊ້ອນ ແລະ ການແຕ່ງຕັ້ງບຸກຄະລາກອນໃຫ້ໄປຕາມທ່າແຮງ ແລະ ຈຸດພິເສດຂອງສະຖາບັນເພື່ອໃຫ້ສອດຄ່ອງ ແລະ ແທດເໝາະກັບແຜນການພັດທະນາຂອງສະຖາບັນ;
3. ຄົ້ນຄວ້າ ແລະ ນຳສະເໜີການແຕ່ງຕັ້ງ, ການຍ້ອງຍໍ, ການປະຕິບັດນະໂຍບາຍຕໍ່ພະນັກງານ-ອາຈານທີ່ຢູ່ພາຍໃຕ້ການຄຸ້ມຄອງຂອງຕົນ ຕໍ່ມະຫາວິທະຍາໄລສຸພານຸວົງ.
4. ສ້າງລາຍຮັບທາງດ້ານວິຊາການດ້ວຍຮູບແບບຕ່າງໆຕາມລະບຽບກົດໝາຍ ແລະ ຕາມການອະນຸມັດຂອງມະຫາວິທະຍາໄລສຸພານຸວົງ;
5. ຄົ້ນຄວ້າ ແລະ ສະເໜີນິຕິກໍາການຄຸ້ມຄອງ-ບໍລິຫານສະຖາບັນເພື່ອໃຫ້ສອດຄ່ອງ ແລະ ແທດເໝາະກັບການພັດທະນາຂອງສະຖາບັນໃນແຕ່ລະໄລຍະ;
6. ຄຸ້ມຄອງ-ບໍລິຫານ ແລະ ນຳໃຊ້ງົບປະມານທີ່ລັດຖະບານສະໜອງໃຫ້, ລາຍຮັບວິຊາການ ແລະ ທຶນຊ່ວຍເຫຼືອຈາກອົງກອນຂອງ ສປຈີນຕາມຂໍ້ກໍານົດ, ລະບຽບຂອງໂຄງການ ແລະ ອົງກອນ. ໂດຍຜ່ານຄະນະສະພາບໍລິຫານສະຖາບັນ ແລະ ມະຫາວິທະຍາໄລສຸພານຸວົງຕາມຂັ້ນຕອນ;
7. ພົວພັນຮ່ວມມືທາງດ້ານວິຊາການ ແລະ ການເຄື່ອນໄຫວວຽກງານຕ່າງໆກັບສະຖາບັນ, ອົງກອນ ແລະບໍລິສັດຕ່າງໆທັງພາກລັດ ແລະ ເອກະຊົນທີ່ຢູ່ພາຍໃນ ແລະ ຕ່າງປະເທດຕາມການມອບໝາຍ ແລະ ໄດ້ຮັບການອະນຸຍາດ ຈາກມະຫາວິທະຍາໄລສຸພານຸວົງ;
8. ຕິດຕາມ, ກວດກາ ແລະ ປະເມີນຜົນການປະຕິບັດໜ້າທີ່ ແລະ ການເຄື່ອນໄຫວຕ່າງໆຂອງພະນັກງານ, ອາຈານ ແລະ ນັກສຶກສາທີ່ຢູ່ໃນການຮັບຜິດຊອບຂອງຕົນ;
9. ມີສ່ວນຮ່ວມໃນການປົກປ້ອງ-ຄຸ້ມຄອງສິດ ແລະ ຜົນປະໂຫຍດທາງດ້ານຕ່າງໆຂອງພະນັກງານ-ອາຈານໃນມະຫາວິທະຍາໄລສຸພານຸວົງຕາມຄວາມເໝາະສົມ;

ປະຕິບັດສິດອື່ນໆຕາມການມອບໝາຍຂອງຂັ້ນເທິງ.

ໝວດທີ 3

ໂຄງປະກອບການຈັດຕັ້ງ

ມາດຕາ 5: ໂຄງປະກອບກົງຈັກ

ສະຖາບັນຂົງຈື ທີ່ ມະຫາວິທະຍາໄລ ສຸພານຸວົງ ປະກອບມີ 4 ພະແນກການດັ່ງນີ້:

1. ພະແນກບໍລິຫານ-ສັງລວມ

• ວຽກງານຈັດຕັ້ງ-ພະນັກງານ ແລະ ກວດກາ
• ວຽກງານບໍລິຫານ-ພິທີການ
• ວຽກງານICT ແລະ ຫ້ອງອ່ານ

2. ພະແນກວິຊາການ ແລະ ຄົ້ນຄວ້າວິທະຍາສາດ

• ວຽກງານຫຼັກສູດ ແລະ ປະເມີນຄຸນນະພາບ
• ວຽກງານແລກປ່ຽນວິຊາການ
• ວຽກງານຄົ້ນຄວ້າ ແລະ ບໍລິການວິຊາການ

3. ພະແນກກິດຈະກໍາ ແລະ ການຮ່ວມມື

• ວຽກງານບໍລິການສຶກສາຕ່າງປະເທດ
• ການຄຸ້ມຄອງຊ່ຽວຊານຕ່າງປະເທດ
• ການແລກປ່ຽນວັດທະນະທຳ

4. ພະແນກການເງິນ ແລະ ຊັບສິນ

• ວຽກງານແຜນການ
• ວຽກງານການເງິນ
• ວຽກງານຄອງຊັບສິນ

ມາດຕາ 6: ​ໂຄງ​ປະກອບ​ດ້ານ​ບຸກຄະລາ​ກອນ

• ໂຄງປະກອບບຸກຄະລາກອນຝ່າຍລາວ 23 ຕໍາແໜ່ງໃນນັ້ນມີຄື:

–  ຜູ້ອໍານວຍການ                  1 ຕໍາແໜ່ງ

–  ຮອງຜູ້ອໍານວຍການ    2 ຕໍາແໜ່ງ

–  ຫົວໜ້າພະແນກ                 4 ຕໍາແໜ່ງ

–  ຮອງຫົວໜ້າພະແນກ  8 ຕໍາແໜ່ງ

–  ພະນັກງານວິຊາການ   8 ຕໍາແໜ່ງ

6. 6. 2 ຊ່ຽວຊານ ແລະ ອາຈານສອນຕ່າງປະເທດ

ສະຖາບັນຂົງຈືມີນັກວິຊາການ ແລະ ຊ່ຽວຊານທາງດ້ານການສອນພາສາຈີນ ແລະ ວິຊາສະເພາະປະຈຳຫຼັກສູດຈຳນວນໜຶ່ງເຊັ່ນ: ຜູ້ອຳນວຍການສະຖາບັນຝ່າຍຈີນ 1 ທ່ານ, ອາຈານ ຫຼື ຊ່ຽວຊານ ແລະ ອາສາສະໝັກຈຳນວນໜຶ່ງຕາມຄວາມຕ້ອງການຂອງວຽກງານໃນແຕ່ລະໄລຍະ.

ໝວດທີ 4

ຫຼັກການ ແລະ ແບບແຜນວິທີເຮັດວຽກ

ມາດຕາ 7: ຫຼັກການ

ສະຖາບັນຂົງຈືເຄື່ອນໄຫວຕາມລະບຽບຫຼັກການດັ່ງລຸ່ມນີ້:

1. ເຮັດວຽກຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດຊອບ ແລະ ປະຕິບັດລະບອບຫົວໜ້າດຽວ;
2. ການເຄື່ອນໄຫວ ແລະ ການດຳເນີນກງານແມ່ນອີງໃສ່ທິດທາງແຜນການລວມຂອງມະຫາວິທະຍາໄລສຸພານຸວົງບົນພື້ນຖານແນວທາງນະໂຍບາຍຂອງພັກ ແລະ ກົດໝາຍຂອງລັດ;
3. ປະຕິບັດລະບອບປະຊຸມ, ຖອດຖອນບົດຮຽນ, ກວດກາປະເມີນຜົນ ແລະ ລາຍງານຕາມລະບຽບການທີ່ໄດ້ຕົກລົງໄວ້.
   ມາດຕາ 8: ແບບແຜນວິທີເຮັດວຽກ

ສະຖາບັນຂົງຈື ມະຫາວິທະຍາໄລສຸພານຸວົງ ມີແບບແຜນ ແລະ ວິທີເຮັດວຽກດັ່ງນີ້:

1. ທຸກການເຄື່ອນໄຫວຂອງ ສະຖາບັນຂົງຈື ມະຫາວິທະຍາໄລສຸພານຸວົງ ແມ່ນອີງໃສ່ຫຼັກການ ແລະ ລະບຽບການຂອງ ມະຫາວິທະຍາໄລສຸພານຸວົງ ແລະ ມະຫາວິທະຍາໄວ ວິທະຍາສາດ ເຕັກໂນໂລຊີຄຸນມິງ.
2. ເຮັດວຽກຢ່າງມີແຜນການ ແຜນງານ ແລະ ໂຄງການລະອຽດໃນການຈັດຕັ້ງປະຕິບັດ ແລະ ປະເມີນຜົນ ຕາມການອະນຸມັດຂອງໂຄງການ ແລະ ມະຫາວິທະຍາໄລສຸພານຸວົງ.
3. ການພົວພັນປະສານງານນຳກັນໂດຍກົງກັບບັນດາຄະນະວິຊາ, ຫ້ອງການ ພາຍໃນມະຫາວິທະຍາໄລ ແລະ ກົມກອງ, ອົງກອນທີ່ຂຶ້ນກັບອົງການ, ກະຊວງຕ່າງໆໂດຍຜ່ານ ມະຫາວິທະຍາໄລສຸພານຸວົງ;
4. ພົວພັນກັບສຳນັກງານຄຸ້ມຄອງສະຖາບັນຂົງຈື ທີ່ປັກກິ່ງ ສປຈີນ ແລະ ພົວພັນປະສານງານກັບອົງການຈັດຕັ້ງສາກົນ ແລະ ອົງການຈັດຕັ້ງຕ່າງໆຕາມການອະນຸມັດຂອງ ມະຫາວິທະຍາໄລສຸພານຸວົງ.

 ໝວດທີ 5

ບົດບັນຍັດສຸດທ້າຍ

ມາດຕາ 9: ງົບປະມານ ແລະ ຕາປະທັບ

ສະຖາບັນຂົງຈືມີງົບປະມານ ແລະ ຕາປະທັບຂອງຕົນ ຕາມລະບຽບຫຼັກການເພື່ອຮັບໃຊ້ໃນການເຄື່ອນໄຫວວຽກງານທາງລັດຖະການ.

 ມາດຕາ 10: ການຈັດຕັ້ງປະຕິບັດ

ໃຫ້ບັນດາຄະນະວິຊາ, ຫ້ອງການ, ສູນຕ່າງໆ ແລະ ຫໍສະໝຸດທີ່ສັງກັດໃນມະຫາວິທະຍາໄລສຸພານຸວົງ ແລະພາກສ່ວນຕ່າງໆທີ່ກ່ຽວຂ້ອງຈົ່ງຮັບຮູ້ ແລະ ປະຕິບັດຂໍ້ຕົກລົງສະບັບນີ້ຢ່າງເຂັ້ມງວດ.

 ມາດຕາ 11: ຜົນສັກສິດ

ຂໍ້ຕົກລົງສະບັບນີ້ມີຜົນບັງຄັບໃຊ້ນັບເເຕ່ມື້ລົງລາຍເຊັນເປັນຕົນໄປ. ຂໍ້ຕົກລົງ ແລະ ລະບຽບການອື່ນທີ່ຂັດກັບຂໍ້ຕົກລົງສະບັບນີ້ລ້ວນແຕ່ຖືກລົບລ້າງ.

                                                                                                                                                                                             ລັດຖະມົນຕີ