ພາກທີ I
ວ່າດ້ວຍໜ້າທີ່ ແລະ ຂອບເຂດສິດ ຂອງຫ້ອງການວິຊາການ
ມາດຕາ 1. ທີ່ຕັ້ງ ແລະ ພາລະບົດບາດ
ຫ້ອງການວິຊາການ ຂຽນດ້ວຍຕົວອັກສອນຫຍໍ້ “ວກ” ແມ່ນກົງຈັກດ້ານບໍລິຫານ ໃນໂຄງປະກອບການຈັດຕັ້ງຂອງ ມະຫາວິທະຍາໄລ ສຸພານຸວົງ ມີພາລະບົດບາດເປັນເສນາທິການໃຫ້ແກ່ອະທິການບໍດີ, ຮອງອະທິການບໍດີ ແລະ ຄະນະບໍດີ ດ້ານວຽກງານວິຊາການ, ການຄຸ້ມຄອງວຽກງານວິຊາການ, ວຽກງານປະກັນຄຸນະພາບການຮຽນ-ການສອນ ເປັນຈຸດໃຈກາງໃນດ້ານການປະສານງານນໍາພາກສ່ວນກ່ຽວຂ້ອງກັບຄະນະວິຊາ ແລະ ວຽກອື່ນໆຢູ່ພາຍໃນ ມະຫາວິທະຍາໄລ ສຸພານຸວົງ.
ມາດຕາ 2. ໜ້າທີ່ ແລະ ຂອບເຂດສິດຂອງຫ້ອງການວິຊາການ
2.1. ໜ້າທີ່
- ສຶກສາອົບຮົມດ້ານການເມືອງແນວຄິດ, ຄຸນສົມບັດ ແລະ ລະບຽບກົດໝາຍຕ່າງໆ ໃຫ້ແກ່ພະນັກງານ, ຄູ-ອາຈານພາຍໃນຄວາມຮັບຜິດຊອບຂອງຕົນ ເພື່ອກາຍເປັນພະນັກງານທີ່ດີ
- ວາງແຜນພັດທະນາວຽກງານວິຊາການ ແລະ ແຜນຍຸດທະສາດໃຫ້ມີຄວາມເຂັ້ມແຂງ, ມີປະສິດທິຜົນສູງ, ຕິດຕາມ ແລະ ປະເມີນຜົນແຕ່ລະໄລຍະຂອງການຈັດຕັ້ງປະຕິບັດ
- ສ້າງ ແລະ ປັບປຸງບັນດານິຕິກໍາທີ່ກ່ຽວຂ້ອງກັບວຽກງານວິຊາການທົ່ວມະຫາວິທະຍາໄລສຸພານຸວົງ ຕິດຕາມ, ກວດກາການຈັດຕັ້ງການປະຕິບັດ, ການຮຽນ-ການສອນຂອງ, ຄູ-ອາຈານທົ່ວ ມະຫາວິທະຍາໄລ ສຸພານຸວົງ
- ຄຸ້ມຄອງການນໍາໃຊ້ແຕ່ລະຫຼັກສູດ ຂອງມະຫາວິທະຍາໄລໃຫ້ຖືກຕ້ອງຕາມມາດຕະຖານຫຼັກສູດແຫ່ງຊາດ
- ຄຸ້ມຄອງ ແລະ ການນຳໃຊ້ງົບປະມານ, ພາຫານະ ແລະ ວັດຖຸສິ່ງຂອງສ່ວນລວມທີ່ຢູ່ໃນຄວາມຮັບຜິດຊອບຂອງຕົນ ບົນພື້ນຖານປະຢັດມັດທະຍັດຕາມລະບຽບການ
- ສະຫຼຸບ-ສັງລວມ ສະພາບການຈັດຕັ້ງການຮຽນ-ການສອນ ຂອງແຕ່ລະຄະນະວິຊາ, ລາຍງານກ່ຽວກັບການຈັດຕັ້ງປະຕິບັດແຜນການ, ໂຄງການ ແລະ ການປະເມີນການເຄື່ອນໄຫວວຽກງານວິຊາການຂອງແຕ່ລະຄະນະວິຊາໃຫ້ອະທິ ການບໍດີ ຮັບຊາບຢ່າງເປັນປົກກະຕິ
- ຕິດຕາມ ແລະ ປະເມີນການຈັດຕັ້ງປະຕິບັດປະກັນຄຸນະພາບການສຶກສາຕາມ 10 ມາດຕະຖານ 50 ຕົວຊີ້ວັດຕາມການປະກັນຄຸນະພາບພາຍໃນ ມະຫາວິທະຍາໄລ ສຸພານຸວົງ
- ຮັບ ແລະ ຄົ້ນຄ້ວາຄໍາສະເໜີຂອງພະນັກງານ, ຄູ-ອາຈານ, ລັດຖະກອນ ແລະ ນັກສຶກສາທີ່ພົວພັນເຖິງຂອບເຂດຄວາມຮັບຜິດຊອບທາງດ້ານວຽກງານວິຊາການ
- ເປັນເລຂານຸການກອງປະຊຸມສະພາວິຊາການ ມະຫາວິທະຍາໄລ ສຸພານຸວົງ
- ປະຕິບັດໜ້າທີ່ອື່ນໆຕາມການມອບໝາຍຂອງຂັ້ນເທິງ.
2.2. ຂອບເຂດສິດ
- ນຳສະເໜີແຜນການ, ແຜນງານ ແລະ ໂຄງການພັດທະນາດ້ານວິຊາການຈາກຄະນະວິຊາຕ່າງໆ
- ສະເໜີແຜນພັດທະນາວຽກງານປະກັນຄຸນະພາບ, ການຮຽນ-ການສອນ ແລະ ການປັບປຸງຫຼັກສູດໃຫ້ຖືກຕ້ອງຕາມມາດຕະຖານຫຼັກສູດແຫ່ງຊາດ
- ນຳສະເໜີແຜນການປັບປຸງຂໍ້ກຳນົດ ແລະ ລະບຽບຕ່າງໆກ່ຽວກັບການຄຸ້ມຄອງວຽກງານວິຊາການໃຫ້ມີຄວາມສອດຄ່ອງກັບສະພາບຄວາມເປັນຈິງພາຍໃນມະຫາວິທະຍາໄລສຸພານຸວົງ
- ລາຍງານຜົນການກວດກາວຽກງານວິຊາການໃຫ້ທ່ານອະທິການບໍດີຊາບເປັນແຕ່ລະໄລຍະ
- ນຳສະເໜີການປະຕິບັດນະໂຍບາຍຕ່າງໆຂອງພະນັກງານ-ຄູອາຈານທີ່ຢູ່ໃນຄວາມຮັບຜິດຊອບຂອງຕົນ
- ນໍາສະເໜີ ແລະ ຄົ້ນຄວ້າຄັດເລືອກບຸກຄະລາກອນບັນຈຸເຂົ້າຕາມຕຳແໜ່ງງານ
- ຕິດຕາມກວດກາການຈັດການຮຽນ–ການສອນ ຂອງອາຈານແຕ່ລະຄະນະວິຊາເພື່ອລາຍງານຕໍ່ຂັ້ນເທິງ
- ຜະລິດ ແລະ ຄຸ້ມຄອງປະກາສະນີຍະບັດຂອງນັກສຶກສາທົ່ວ ມະຫາວິທະຍາໄລ ສຸພານຸວົງ
- ປະຕິບັດສິດອື່ນໆຕາມການມອບໝາຍຂອງຂັ້ນເທິງ.
ພາກທີ II
ໂຄງປະກອບການຈັດຕັ້ງ ແລະ ໂຄງສ້າງບຸກຄະລາກອນ
ມາດຕາ 1. ໂຄງປະກອບກົງຈັກ ແລະ ໂຄງສ້າງບຸກຄະລາກອນ
ກ. ໂຄງປະກອບກົງຈັກການຈັດຕັ້ງຂອງຫ້ອງການວິຊາການ ປະກອບມີ 4 ພະແນກຄື:
- ພະແນກບໍລິຫານ
- ພະແນກຄຸ້ມຄອງຫຼັກສູດ
- ພະແນກທະບຽນ ແລະ ວຸດທິບັດ
- ພະແນກປະກັນຄຸນນະພາບ
ຂ. ໂຄງປະກອບບຸກຄະລາກອນ ແລະ ຕໍາແໜ່ງງານຫ້ອງການວິຊາການ ມີຈໍານວນ 23 ຕໍາແໜ່ງ ລາຍລະອຽດດັ່ງນີ້:
- ຫົວໜ້າຫ້ອງການ 01 ຕໍາແໜ່ງ
- ຮອງຫົວໜ້າຫ້ອງການ 02 ຕໍາແໜ່ງ
- ຫົວໜ້າພະແນກ 04 ຕໍາແໜ່ງ
- ຮອງຫົວໜ້າພະແນກ 08 ຕໍາແໜ່ງ
ພະນັກງານວິຊາການ 08 ຕໍາແໜ່ງ
